Lejla Beqiri Vula ka përfunduar studimet bachelor në flaut interpretim në Universitetin “Shën Kirili dhe Metodi” në Shkup (2012), dhe më pas studimet master në të njëjtin drejtim në Akademinë e Arteve në Novi Sad (2014), nën mentorimin e flautistes së njohur Laura Levai Aksin. Në vitin 2019, përfundoi doktoraturën në Universitetin e Ri Bullgar në Sofje, me mentore flautisten Lydia Oshavkova. Ajo gjithashtu ka përfunduar magjistraturën e dytë në shkencat muzikore në Shkup (2022).

Si flautiste, Lejla ka performuar me orkestra simfonike ndërkombëtare në SHBA, Gjermani, Zvicër, Francë, Letoni, Austri, Bullgari, Turqi dhe rajonin e Ballkanit, si dhe ka dhënë recitale në shumë shtete të rajonit dhe festivale ndërkombëtare. Është fituese e 17 çmimeve të para dhe të dyta në gara ndërkombëtare, përfshirë çmimin absolut në konkursin ArsKosova dhe çmimin e dytë në konkursin botëror “Earth and Music” në Sofje.

Për tetë vite është Koordinatore Nacionale për “European Association for Music in Schools” (EAS) dhe ka qenë pjesë e projektit kërkimor shkencor Schools@Concerts (2017–2021), i përmbyllur me botimin e një libri nga Akademia Mozarteum në Salzburg. Ka mbi 9 publikime shkencore në fushën muzikore.

Përveç karrierës koncertale, Lejla është e angazhuar në pedagogji të flautit për 16 vite, në institucione si shkollat profesionale të Shkupit e Tetovës dhe Fakulteti i Muzikës në Tetovë. Aktualisht, ligjëron në shkollën “Prenk Jakova” në Gjakovë dhe në Fakultetin e Arteve në Universitetin “Haxhi Zeka” në Pejë.