Chopin Piano Fest Prishtina është ndërtuar me përkushtim dhe përgjegjësi, duke krijuar ndër vite një trashëgimi të gjallë, një kujtesë artistike me të cilën publiku ynë është lidhur dhe që e pret çdo herë me të njëjtën ndjenjë entuziazmi. Në këtë proces, është reflektuar edhe rrugëtimi ynë si shoqëri: një rritje e ndjeshmërisë dhe vetëdijes për vlerat muzikore, si dëshmi e vendit që zë kryeqyteti ynë në raport me artin.

Në edicionin e tij të 16-të, festivali vjen me këtë vetëdije të konsoliduar, jo më si një nismë që kërkon të dëshmojë veten çdo vit, por si një vlerë e qëndrueshme, e ndërtuar dhe e besuar. Programi i këtij edicioni vazhdon këtë linjë, duke sjellë një ekuilibër të kujdesshëm mes artistëve të afirmuar dhe zërave të rinj, në përputhje me boshtin artistik që e ka formësuar festivalin që nga fillimi.

Mirënjohja jonë e thellë shkon për të gjithë ata që, me mbështetjen e tyre, e bëjnë të mundur këtë rrugëtim. Një falënderim i veçantë për ekipin tonë, për përkushtimin dhe punën e palodhur që qëndron pas çdo edicioni gjithmonë në shërbim të publikut tonë besnik.

Presidentja e AKC,
Lejla Haxhiu Pula – Drejtoreshë artistike e Chopin PianoFEST-it